रुकुम पश्चिम
१९ असार/ रुकुम पश्चिममा नेपाली काङ्ग्रेस र नेकपा माओवादी केन्द्रका कार्यक्रता बिच झडप हुँदा दुई जना गम्भीर घाइते भएका छन। शुक्रवार साँझ आठबिसकोट नगरपालिका-३ खदीमा भएको दोहोरो झडपमा परेर माओवादीका कार्यकर्ताहरु गोपाल विक र राजु विक गम्भीर घाइते भएका जिल्ला प्रहरी कार्यालय रुकुम पश्चिमका प्रमुख प्रहरी नायब उपरीक्षक ध्रुवकुमार श्रेष्ठले बताएका छन । खदीको तलिगाउँ र माथिगाउँमा रहेका माओवादी र कांग्रेस कार्यकर्ताबीच सामान बोकेर ल्याइएको घोडा र ट्र्याक्टर ठोक्किएको विषयमा विवाद हुँदा झडपको स्थिति सिर्जना भएको थियो ।
झडपमा संलग्न नेपाली कांग्रेसका गोपाल बोहरासहित केहीलाई प्रहरीले नियन्त्रणमा लिएको डीएसपी श्रेष्ठले जानकारी दिएका छन । उनका अनुसार भौगोलिक रुपले विकट र सञ्चार सम्पर्क समेत हुन नसकेको घटनाको थप विवरण आउन सकेको छैन ।
नेपाली कांग्रेस रुकुमले भने पक्राउ परेका भनिएका गोपाल बोहरासहित केही कार्यकर्तालाई माओवादी कार्यकर्ताले हतियारसहित आक्रमण गरेर बेपत्ता बनाएको आरोप लगाएको छ । गम्भीर घाइते दुवै जनालाई उद्धारको लागि हेलिकप्टर मगाएको भए पनि खराब मौसमको कारण सम्भव नभएको श्रेष्ठले बताएका छन ।
अहिले सडक पुगेको ठाउँसम्म एम्बुलेन्स पठाउने र घटनास्थलबाट स्टेचरमा ल्याएर आठबिसकोट नगर अस्पताल ल्याउने तयारी भइरहेको उनले जानकारी दिएका छन ।घटना लगत्तै जिल्ला प्रहरी कार्यालयबाट र आठबिसकोट इलाका प्रहरी कार्यालयबाट थप प्रहरी पठाएर स्थिति नियन्त्रणमा लिइएको डीएसपी श्रेष्ठले बताएका छन । स्रोत: उज्यालो अनलाइन
